講番今次試酒嘅經驗，大至上都好滿意。對一般香港人嚟講，除咗冰酒之外，普遍都唔會太認識加拿大出產嘅葡萄酒。論名氣，佢哋同傳統歐洲產地冇得比；論價錢又唔係比其他新興產區平，但係好在有自己嘅特色，盡量利用好當地嘅氣侯同土壤製造出＂自己＂嘅酒。好似地處較北嘅 Kelowna 就主要生產味道清香嘅德國種白酒，落到嚟南面較熱同多陽光嘅 Oliver 就集中生產味道較濃嘅紅酒。但始終嚟講，加拿大酒唔會好似加州或澳洲酒咁濃味。太濃味飲得多都會悶，好多飲得酒耐嘅朋友反而鍾意d味道冇咁誇張嘅酒。今次旅程其中一個驚喜就係揾到幾隻好啱飲嘅 sparkling wine，最 happy 嘅當然係我嘅 Bubblies Queen 啦。
加上酒莊嘅環境好靚，有 d 裝修得華麗典雅，有 d 簡單撲素，更有 d 用上超現代主意，各有千秋。可以坐低食 d 嘢歎番杯固然之一流啦，但只係去試吓酒，影番幅相都係件賞心樂事。
至於踩單車方面，我哋最鍾意嘅就係每日踩車嘅環境同所睇嘅風景都唔同，完全唔會悶，加上里數唔多，又冇乜斜路，完全適合好似我班 friends 嗰 d 既想有新意但又怕辛苦嗰 d 人玩。而我哋今日踩車嘅地方 Oliver, 既有大樹林蔭嘅單車徑，又有車唔多嘅馬路可以一試自己嘅身手，可謂大家嘅需要都照顧得到。
行程好快就去到尾聲，真係快樂不知時日過，聼日喺附近玩多半日就返去温哥華。今次除咗玩得開心、將 d心煩嘢通通放低之外，其中一個最大嘅收獲就係將單車旅遊嘅樂趣介紹俾班 friends識，咁大家下次又可以約埋再玩過，成班 friends一齊玩特別好玩吖嗎。
