喺加拿大踩單車的確係唔錯，好似我哋今日踩嗰段路咁，差不多全程都係喺條同馬路分隔開嘅單車徑上面踩，唔駛驚人車爭路，玩都玩得輕鬆自在好多。

今日踩嘅路線同之前嘅好唔同，大部份時間都係沿著個 Skaha 湖向 Okanagan Falls 嘅方向進發，基本上係貼着個湖邊踩，經常有陣陣涼風喺湖上吹過嚟，所以踩得特別舒服。

路上仲種咗幾棵野生嘅櫻桃樹，但只最可惜錯過咗個收成期，唔係嘅話就可以一嘗即摘即食櫻桃嘅滋味，真係諗起都流口水。

究竟加拿大人係唔係真係咁鍾意食雪糕嘅呢？食完個 lunch 後領隊哥哥就帶咗我哋去見識下當地一間出晒名嘅雪糕屋。佢哋嘅選擇固然多，但最誇張嘅係雪糕嘅 size。我 order咗個 standard cone，但點知佢哋真係落足料，足足有兩個半球，而每個球就有我個拳頭咁大，呃你就正衰仔。我同班 friends 都唔知食得幾開心，就連我女友都話之佢，一於食咗先再算。照計我哋今日踩單車所消耗咗嘅卡路里都可以 offset 番啩!