如果畀你揀一種交通由東京去大阪（或由大阪返東京），恐防你都係揀新幹線或者內陸機，長途巴士嘛……嘩，年紀唔細囉，坐得咁唔舒服，唔好攞苦嚟辛啦！但1 月 18 日之後，由關東巴士及両備巴士兩間公司共同經營，推出一款名「Dream Sleeper」 行駛東京大阪之間的長途巴士, 全車只得 11 個座位，仲要全部係個室！每個個室面積約 85 cm X 160 cm，座位好似飛機座位咁，有自動掣調較斜度同墊腳位的高度，仲有音樂聽、摺枱、眼罩、耳塞、耳筒、空氣清新機、USB 插頭同 Wi-Fi 等一應俱全。巴士仲備有洗手間同洗面間，照顧晒乘客需要。
每個個室都有趟門，拉埋即變私人空間。
個室裡有齊 USB 叉電位、摺枱、兩扁腳插蘇位、空氣清新機、耳塞、耳筒、眼罩、拖鞋，仲有埋 Wi-Fi
洗手間比一般巴士豪華美觀。
Dream Sleeper 東京大阪號
通車日期：1 月 18 日起
行駛地點：東京池袋駅西口 <-> 大阪 なんば（OCAT）－－両備巴士門真車庫（大阪府門真市）
單程車費：成人 20,000 日圓、小童 15,500 日圓，2 月 28 日前優惠價，成人 18,000 日圓、小童 14,500 日圓(雖然搭新幹線單程飛都係 13,620日圓，但咁有私隱咁豪華嘅享受，係值得一試嘅！)
行車時間：東京往大阪：10:50pm 東京池袋駅西口 7 號乘車場開車、6:40 am 到大阪 なんば（OCAT）、7:30 am 到両備巴士門真車庫
大阪往東京：9:50 pm 両備巴士門真車庫開車、10:40pm 到大阪 なんば（OCAT）、6:40 am 到東京池袋駅西口 7 號乘車場
