法拉利、F1 賽車迷留意，繼杜拜阿布札比嘅 Ferrari World 之後，歐洲第一個法拉利主題樂園將於西班牙開幕！
Ferrari Land，位於巴塞隆那以南、一小時車程外的名城塔拉戈納（Tarragona）周邊，屬於國內最大主題樂園 PortAdventura 的最新園區。園內設 5 個機動遊戲，最大賣點係一個號稱歐洲最高+最快、名為 Vertical Accelerator 的「垂直加速器」，車卡於 5 秒內由零「踩行油」到時速 180 公里，直飆上 112 米高的「n」型軌道，再拋個靚彎，繼而直插地面落返嚟，據稱玩家可 feel 到 G Force 1.35 嘅感官衝擊，總之就必定貼實椅背、個心離一離啦。
「垂直加速器」最高點為 110 米，「n」型軌道全長 880 米，仲話 5 秒內加速到 180 Kmh，咪好快玩完？會唔會連尖叫都唔夠時間？旁邊仲有另一重點遊戲 Bounce-Back Tower，55 米高的跳樓機打孖上。
12 座位車卡設計成一級方程式賽車外殼－－好似係！每小時可供 1,200 人乘搭，似乎真係「咋」一聲玩完，應該唔使排好耐。
預想環境圖，仲有以一級方程式為主題嘅展館、模擬跑車試玩、餐廳及主題酒店等設施，務求畀遊客一個完整嘅法拉利體驗。
圖中紅圈位置的 Ferrari Land，面積約 7.5 公頃，即大約 1/4 個香港迪士尼樂園左右，其實係要玩埋 PortAdventura 先回到本。傳聞第三個法拉利主題樂園將於未來數年落戶中國某個一綫城市，唔知係咪喺上海同迪迪尼打對台呢？
