唔經唔覺就去到另外一個產酒區喇。Naramata Bench 嘅酒莊密度出咗名好高，加上所種嘅葡萄品種繁多，可以講得上係百花齊放。聽講呢度每平方公頃嘅平均地價比 Napa Valley 仲要高，全因為氣侯十分適合種植葡萄，咁今日就等我哋嚟驗証一下。 呢度嘅環境除咗啱種葡萄之外，踩單車一樣冇得頂。原來條 Kettle Valley Railway Trail 途經 Naramata，可以由 Myra Canyon 直接踩單車落嚟，但係部份路面唔係咁靚，有好多沙石，加上路程遠，一日踩晒會好辛苦。所以領隊話佢哋另外有一團由 Myra 直踩落 Naramata, 但支援車會喺最差嘅路段之前將客人接上車，免得佢哋嘅 patpat 受罪，而我哋今日就只係踩 Naramata 呢一段路。 好多人成日揾呢段路同 Myra Canyon 比較，我就覺得好唔公平囉，因為佢哋各有各靚。喺呢度有個無敵 Okanagan 湖景，加上可以從高處睇哂個 Penticton 全景，附近又多地方飲飲食食，方便好多。最過癮就係踩車經過d果園時，因為正值蘋果收成期，所以路上兩旁嘅蘋果樹上都掛滿一個二個又大又紅嘅蘋果。仲可以幫襯果園主人買番杯清甜到入心嘅鮮榨蘋果汁飲添，買番 d 係路上食就唔在講啦。   千其唔好話我晒命，但係呢幾日去酒莊歎 lunch 都好似係指定動作咁。踩完車坐係個 outdoor patio 上食個 lunch，飲番杯葡萄酒，享受下陣陣涼風，都唔好話唔爽。     Naramata 的確有好多大大小小嘅酒莊，各具特色，所以大家試酒都試得好開心。